 |
| Foto: María José Vilasánchez |
O pasado venres 27 a Biblioteca Municipal de
Ortigueira acolleu unha charla sobre a escritora Elena Quiroga impartida
por Alfredo Torres Bouza, profesor de Língua e Literatura. O
acto, organizado en colaboración coa asociación Terras do Ortegal, trata de poñer
en valor a estancia da escritora na nosa vila en 1949 –van alá 69 anos- durante
a cal redactou a novela Viento del Norte, gañadora do
prestixioso Premio Nadal 1950.
 |
| Foto: David Rguez. Morado |
A sesión literaria comezou cunhas palabras de Vanesa Trevín, concelleira de
Cultura de Ortigueira, que enmarcou o acto nas celebracións do Día do Libro
2018, que tiveron como epicentro a Biblioteca Municipal, con charlas e
concursos no colexio público José María Lage, así como entregas de
libros nas diferentes parroquias do concello e na propia biblioteca por parte
de María José Vilasánchez e Mónica Pérez Armada, directora e
axudante da biblioteca.
Dando paso á charla en si mesma, o relator foi presentado pola
escritora Obdulia Dopico, que repasou brevemente o curriculum e
vida persoal de Alfredo Torres, revelando, entre outras cousas que colabora coa
revista Terras do Ortegal como corrector lingüístico, e que tal vez teña que aprender chino, dada a
estancia naquel país asiático dunha filla sua.
Torres apoiou a sua disertación con imaxes da obra e a vida de
Elena Quiroga, de quen destacou que foi a terceira muller elexida como membro
da Real Academia Española. Dividiu a charla en tres partes:
 |
| Chalet que foi de Segunda Calvo Foto: XMª Torres |
a) Elena Quiroga entre os escritores da sua época
b) A obra literaria de Elena Quiroga
c) A novela Viento del Norte e a súa relación con Ortigueira.
Torres foi debullando con extensión e erudición –obxectivismo,
realismo, crítica social…- a vida e obra de Elena Quiroga (1921-1995), nunha
especie de lección magistral, como declarou ao final Luli Dopico.
A vida de Elena Quiroga transcorre por Santander, onde nace, a
Casa Grande de Viloira (O Barco de Valdeorras), onde pasa unha feliz infancia, Bilbao, Roma, A Coruña, Madrid –onde vive co
seu esposo, o historiador e xenealoxista Dalmiro de la Válgoma, Secretario
perpetuo da Real Academia da Historia- e Nigrán. Na cidade da Coruña vivía con
seu pai, José Quiroga Velarde, conde de San Martín de Quiroga; nesta mesma
cidade vivía tamén o ortegano Dámaso Calvo, irmao de Segunda Calvo, e amigo do
pai de Elena Quiroga; Dámaso invitaría á escritora a pasar unha temporada en
Ortigueira e escribir na casa de Segunda, unha señora, xa viuva, que vivía a
mitade do ano nun amplo chalet modernista na nosa vila, e a outra mitade en
Madrid. |
| Pazo de Brandaliz |
Elena Quiroga aproveita a estancia, como ten revelado o xornalista
Ramón Barro, para visitar as casas nobles da comarca, como o pazo do Souto,
en Mera, solar da familia Pita, ou Torre de Lama, en Ribeiras do Sor, solar da
familia Pardo de Lama, e sobre todo o pazo de Brandaliz, en Luama. Neste fermoso
e antigo pazo, antigo solar dos Ponce de León, e propiedade hoxe da familia
Teijeiro, situaría a escritora a acción de Viento del Norte. Torres
presentou documentos procedentes do arquivo familiar de José Antonio Calvo
que atestiguan o nacemento en Ortigueira da novela premiada co Nadal.
Torres finalizou agradecendo a atención con que foi seguida a
charla, que se prolongou algo máis do previsto pola paixón do orador, que desde
un principio acolleu con entusiasmo a proposta de divulgar e poñer en valor a
obra da escritora Elena Quiroga, ligada para sempre, a traveso da novela Viento
del Norte, á vila de Ortigueira, algo que tal vez debería ser obxecto
dalgunha expresión conmemorativa.
Ningún comentario:
Publicar un comentario