Presentación do proxecto dunha revista de estudos sobre a comarca do Ortegal

O pasado 27 de decembro de 2013 realizouse a presentación pública do proxecto dunha nova revista de estudos da comarca do Ortegal. Coa presenza dunhas 20 persoas, tres dos promotores (José Manuel Bouzamayor, José Manuel Suárez e Xosé María Torres) presentaron a orixe da proposta e as liñas mestras do que será a revista.

A idea é promover unha revista en formato libro, de regularidade semestral, que acolla traballos de divulgación e investigación de tipo cultural e histórico, cunha perspectiva ampla, con artigos que vaian desde a etnografía, movementos sociais, patrimonio, economía… sempre cunha perspectiva da comarca do Ortegal: Mañón, Ortigueira, Cariño, Cerdido e Cedeira, ou zonas colindantes

Os pasos a dar nos próximos meses serían os seguintes:

•     Constitución e rexistro dunha asociación, que sería a encargada de publicar a revista.

•     Busca de financiación para a revista, que incluirá unha iniciativa de de micromecenazgo por internet (crowdfunding).

•     Novo evento de difusión, xa co nome definitivo da revista, posiblemente coa presentación da maqueta e avance de contidos do primeiro número.

•     Saída do primeiro número da revista, no verán de 2014.

Os asistentes á reunión, entre os que se atopaban diversas persoas con interese nos temas culturais e de investigación, comprometeron apoios económicos e para a posta en marcha do proxecto.