Presentación do Quinteto de Vento ORTY BRASS

.

ORTYBRASS  é unha formación de cinco músicos, todos eles de Ortigueira excepto un. Somos músicos de ampla experiencia no mundo das bandas de vento. O nome vén de xuntar dous termos: Orty (polo nome da vila) e Brass que en inglés significa "metais", en clara referencia aos instrumentos que tocamos; así, formamos o que se chama un quinteto de metais:

- 2 trompetas, Juan Sixto Sueiras (trompeta concertino, 21 anos) e Christofer Martínez Sandomingo (trompeta 2ª),

- 1  trompa, William A. Peckens Lorenzo (28 anos), 

- 1 bombardino, Manuel Ramos Castro (19 anos)

- 1 tuba, José Javier Melgar Bellido (43 anos), natural de Xixona (Alacante).

Arrancamos no mes de febreiro do ano pasado, 2017, nun local de ensaio que nos cedeu o concello nos baixos do antigo Hospital de San Roque, onde ten a sede a Escola de Gaitas, pero ao pouco tempo cambiámonos ao local no que na actualidade estamos a ensaiar, na rúa Magdalena.

Este proxecto cultural ten o seu alicerce nunha inquedanza por facer música cunha formación máis pequena, fora da banda tradicional, ensaiar un repertorio diferente, e facer colaboracións con outras formacións da vila (sexan musicais ou non).

Da man de Carlos Caramés, director da Coral Polifónica de Ortigueira fixemos as nosas primeiras actuacións;

- Na misa da Patrona do ano pasado interpretamos a Misa de Manuel Cela para coro e instrumentos de vento (obra que foi estreada na visita do Papa á catedral de Santiago no ano xacobeo).

- Esa mesma obra a tocámola nas festas das Grañas no mes de setembro e logo tamén na festividade do Pilar en San Sadurniño, onde tamén interpretamos o "Ave verum corpus" de Mozart.

- A última actuación que fixemos foi con motivo do Pregón de Semana Santa que realizou o Bispo de Mondoñedo, Mons. Luis Ángel de las Heras, o pasado 9 marzo na igrexa parroquial de Santa Marta; aquí interpretamos música relixiosa para coro e intrumentos de vento.

No futuro queremos ampliar o número de músicos e de instrumentos para chegar a conformar unha auténtica "Brass Band" para dar unha ampla oferta musical dentro da bisbarra e manter durante todo o ano -e non só no verán- un bo abano de actividades musicais no concello.

(Autoría do texto: José Javier Melgar Bellido)